Ekitaldian egon dira Eusko Jaurlaritzako jarduneko sailburu gehienak, Maria Chivite Nafarroako Gobernuko presidentea, Gipuzkoako, Arabako eta Bizkaiko ahaldun nagusiak eta alderdi politikoetako buruzagiak; besteak beste, EAJko Andoni Ortuzar eta Joseba Egibar, eta EH Bilduko Arnaldo Otegi.
Bestalde, Fernando Grande-Marlaska Barne ministroa izan da Espainiako Gobernuaren ordezkari. Lehendakari ohiei dagokienez, Patxi Lopez egon da bakarrik.
Bi aretotan
Koronabirusaren eraginez, ekitaldira gonbidatutakoak bi aretotan banatu dituzte. Bilkura aretoan legebiltzarkideen ordezkaritza bat eta Urkulluren emaztea eta seme-alabak egon dira. Guztira, 72 pertsona. Gainerakoak, beste 53, Beirateen gelan egon dira. Tartean, ahaldun nagusiak eta jarduneko sailburuak.
Sailburu berrien izendapena
Karguari zin egin ostean, 15:00 aldera emango ditu jakitera Urkullu lehendakariak Eusko Jaurlaritza osatuko duten kideen izen-abizenak.
