Desadostasunak ere izan diren arren, bi alderdiek "helburu bera" dutela azpimarratu dute, eta beharrezkotzat jo dute hurrengo Gobernuak hartu beharreko "erabaki premiazkoenak argi definitzea". Ohar bateratuan azaldu dutenez, Nazio Batuen 2030 agendarekin lerrokatuta, herritarren osasuna bermatzea eta ekonomia eta enplegua suspertzea –eta pandemiaren aurreko mailak berreskuratzea– da lehentasuna, baina "erronka eta behar berrietara" egokituta: "Gobernu-programa berria lau jarduera-ardatzetan egituratuta dago, Nazio Batuen Garapen Iraunkorreko Helburuekin eta gure errealitate ekonomiko, sozial eta instituzionalarekin lerrokatuta: oparotasuna, pertsonak, planeta eta bizikidetza, autogobernua eta giza eskubideak".
Erabakia berresteko astelehenean egingo dute jeltzaleek Batzar Nazionala eta PSE-EEk ere kontsulta egingo du alderdikideen artean. Inbestidura-saioa, berriz, irailaren 3an egingo dute.
Iriarteren hautagaitza ere bai
Bihar, egubakoitza, bukatzen da Lehendakaritzarako hautagaiak aurkezteko epea, eta EH Bilduk Maddalen Iriarte aurkeztu du. Otegiren esanetan, herritarrek "alternatiba bakar gisa" ikusten dute EH Bildu, eta horregatik erabaki dute Maddalen Iriarte aurkeztea. "Gobernatzeko beste modu batzuk daudela erakutsi nahi dugu", gehitu du koordinatzaile nagusiak. Hautagaitza bihar aurkeztuko dute ofizialki, Huarten egingo duten ekitaldian.