Eusko Jaurlaritzako Segurtasun sailburu Josu Zubiagak eta Ondare Naturala eta Klima-aldaketarako zuzendari Aitor Zuluetak premiazko agerraldia egin dute, azken ordukoak kontatzeko.
Arratsaldeko 17:00ak aldera topatu dute gizar-hezurra Joaquin Beltran eta Alberto Sololuze topatzeko lanetan ziharduen patruilak. Aurkikuntza zabortegiko baskularen beheko aldean egin dute, egituraren parte zen hamabost metro luzeko metalezko xafla baten azpian.
Era berean, azaldu dute, aurrerantzean jarraituko duten protokoloa. "Zonaldea mugatuko dugu, eta kontu handiagorekin egingo dugu lan. Gainera, topatutako hezurrari analisi zientifikoa egingo zaio", esan du sailburuak. Azken horiek emaitzak ezagutzeko hainbat egun beharko direla esan du Zubiagak, eta "pazientzia apur bat gehiago" eskatu die Beltranen eta Sololuzeren senitartekoei.
Sei hilabete
Otsailaren 6an, arratsaldeko laurak aldera, gertatu zen ezbeharra . Zabortegiko baskularen inguruan zeuden bi langileak lurperatuta geratu ziren, eta Bilbo eta Donostia lotzen dituen errepidea hainbat egunez itxita egon zen, lurjausiak errepidearen bi erreiak harrapatu zituelako.