Kepa Errastik (Aretxabaleta, 1981) idatzitako antzerki lan arrakastatsuan oinarrituta dagoen Erlauntza filma, konfinamendu ostean grabatu den pelikuletako bat izan da. Osasun neurri guztiekin grabatu dute eta uztailaren 31n amaitu zituzten grabaketak. Errodaje osoa Bizkaiko Gamiz-Fikako landetxe batean egin dute, Acronica eta Tentazioa produkzioen eskutik. Eskarmentudun gidoilaria da Errasti eta 2018an Donostia Antzerki Saria jaso zuen Errastiren Mami Lebrun lanak.
Mireia Gabilondo aktore eta zuzendaria (Bergara, 1964) arduratu da Erlauntza filma zuzentzeaz. 2013an, bakarka zuzendutako lehen filma aurkeztu zuen Amaren eskuak. Gabilondo Donostiako Tanttaka antzerki taldearen sortzaileetako bat ere bada eta makina bat antzezlan zuzendu ditu.
Komedia oinarri
Landetxe batera doazen lagunen istorioa kontatuko du. Betidanik lagunak diren sei emakume abiatuko dira bertara, horietako baten ezkongabeko agurra ospatzera. Lanak adiskidetasunaren eta sortzen diren tira-biren inguruan jardungo du.