Akordioa aztertu ondoren eta araubide erkideko udalerrien eta foru-lurraldeetakoen artean ageriko aldeak daudela ikusita, Arabako, Bizkaiko eta Gipuzkoako Aldundiek gogorarazten dute akordioak ez diola eragiten Euskadiko udal-egitura eta -sistemari. Ildo horretatik, honako hau adierazten du ohar bateratuan:
• Euskal Autonomia Erkidegoan foru aldundiei dagokie Lurralde bakoitzeko toki-erakundeen finantza-tutoretza.
• Lurralde historikoetan indarrean daude toki-erakundeen aurrekontu-egonkortasuna eta finantza-iraunkortasuna arautzen dituzten bidezko foru arauak, euskal udaletan superabiten erabilera arautzen dutenak.
• Euskal erakundeen –toki-erakundeak barne– finantzaketari eta iraunkortasunari buruzko edozein erabaki edo akordio Ekonomia Itunaren Batzorde Mistoaren barruan hartu beharko da, aldebikotasun-printzipioaren arabera.
Unai Rementeriak (Bizkaia), Ramiro Gonzalezek (Araba) eta Markel Olanok (Gipuzkoa) nabarmendu dute, ez dela aurreikusten aipatutako Errege Lege Dekretuan xedatutakoa Euskadiko toki-erakundeetan aplikatzeko aukera, EAEko udalerriei aplikatu beharreko foru-berezitasunaren ondorioz.