Izan Bidea dinamikaren baitan, bizikleta martxa egingo dute bihar, Basauriko espetxetik abiatuta –09:00etan–. Bilbora iristea izango da helburua, "presoen eta iheslarien auziari behin betiko aterabidea emateko". Arrasateko Sareko kide Premin San Pedrok azaldu duenez, "martxa nazionala" izango da, eta zenbait debagoiendarrek hartuko dute parte horretan. Martxaren hasierara joateko autoak antolatzen ari dira, eta, beraz, joan nahi duenak Sareren webgunean eman behar du izena; beranduenez, gaur.
Mugikorrerako aplikazioa
Izan bidea lelopean egingo dituzten kilometroak zenbatzen joateko, izen bera daraman mugikorrerako aplikazio bat sortu dute. Hala, edozein pertsona edo elkartek izena eman dezakete, kilometroak gehitzeko. "Euskal Herriak dituen herritar kopurua egin gura ditugu kilometrotan: 3.127.326, hain zuzen", azaldu dute Saretik.
Ekintza ugari
Maiatzaren 29an dinamika aurkeztu zutenetik ekintza ugari eraman dituzte aurrera, Debagoienean. Besteak beste, uztailaren 18an Aloñara igoera egin zuten bizikletan; eta 19an, bestalde, Arrasateri bira eman zioten, presoen eta iheslarien alde. Arrasateko Sarek aurreratu du irailetik aurrera ekintza ugari antolatuko dituztela.