Maiatzean webinarrak eta online ikastaroak protagonista izan baziren ere, dagoeneko jarduera presentzialak egiten ari dira PT Garaia parke teknologikoan: "Ekaina eta uztaila, bilera korporatibo batzar eta aurrez aurreko hitzaldi informatiboz beteriko hilabetea bihurtu dira, galdutako erritmoa berreskuratuz".
Osasun protokoloak abiatu eta espazioak egokitu dituztela azaldu dute kudeatzaileek, eta hala, Sareteknikaren Batzar Orokorra egin dutela, besteak beste. Guztira, esan dute azken bi hilabeteetan egin dituzten 15 ekimenetan 1.400 pertsona baino gehiagok parte hartu dutela.
Bailarako enpresentzat, erabilgarri
Adierazitako denbora tartean, bailarako hainbat enpresak izan dituzte bilerak PT Garaian; hala nola, Eroskik, Ategik, Ekidek, Mondragon Assemblyk edota Fagor Ederlanek.
Parke Teknologiko arduradunek argitu dutenez, "neurri guztiak" bete dituzte batzarrak egiteko, eta hurrengo hilabeteetan ere aretoak egokitzen jarraituko dute enpresen eta komunitatearen "beharrei erantzuteko".
