Debagoieneko Mankomunitateak abiatutako Geroa bermatuz ekimena enpresen transmisioarekin dago lotuta; adierazi dutenez, batez ere enpresaren barruko transmisioa lantzea dute helburu. COVID-19a dela-eta bertan behera utzi zuten bigarren saioa, baina uztailaren 20an egingo dela azaldu dute, Foru Aldundiaren finantziazioarekin.
Sustatzaileen esanetan, enpresen transmisioan gizarte-ekonomiak eskaintzen dituen formulak aztertzeaz gain, 2020rako laguntza-deialdien berri ere emango dute. Bestalde, asistentzia doakoa dela azaldu dute, baina aurrez izena eman beharko da 943 793090 zenbakira deituta edo online.
Bigarren saioko egitaraua aurkeztu dute
9:30ean hasiko da saioa Debagoieneko Mankomunitatearen egoitzan, eta eguerdiko 13:00ak arte luzatuko da. Jardunaldiaren aurkezpena egingo dute lehenengo, eta ondoren, Norberto Albonigak kooperatibismoaren eta ELKARLANen zerbitzuen inguruan jardungo du. Atsedenaren ostean, Ana Isabel Yoldi Lan Sozietateen inguruan arituko da eta ASLEren zerbitzuen berri ere emango du. Bukatzeko, 2020ko laguntza-deialdien informazioa emango dute; zehazki, gizarte-ekonomia sustatzeko eta enpresen transmisiorako laguntzena.