Gipuzkoako foru Ogasunak gaur plazaratu du bere zordun handien bosgarren zerrenda. Bertan, 2019ko abenduaren 31n milioi bat euro baino gehiagoko zorra zutenen identifikazioak jaso dituzte: 53 zordun daude eta guztira, 292,4 milioi euroko zorra erregistratu da.
Foru Aldundiak azaldu duenez, izen horiek plazaratzea foru erakundearen "iruzurraren aurkako estrategiaren testuinguruan" kokatzen da, eta "gaizki ikusiak" dauden jokaerak publiko eginez "gizartearen gaitzespena" lortu nahi dute: "Foru Ogasunaren helburua zerrenda kaleratuta pedagogia egitea da zerga betebeharrak borondatez betetzearen inguruan, eta, era honetara, gizartearen gaitzespena lortu eta zerga iruzurraren aldeko jarrerak eragotzi".
Araudiaren arabera, datorren urtean berrituko da zerrenda, eta erreferentzia eguna aurtengo abenduaren 31 izango da. Prozedurari dagokionez, zerrendan sartzeko proposamena zordunari jakinarazten zaio, eta 10 egun ditu alegazioak aurkezteko. Epe horren ostean, informazioa publiko egiten da, eta euskarri elektronikoetan argitaratzen dira datuak; hiru hilabetez egoten da ikusgai.
