Correosek jakitera eman duenez EAEko bulegoek ohiko ordutegia errekuperatuko dute bihartik aurrera –Covid-19aren pandemiagatik ordutegi murriztuekin ibili dira–; hala, orain arte goiz eta arratsaldez zerbitzua eskaini duten bulegoetan normaltasunez egingo dute lan, eta normalean goizez bakarrik zabaltzen zuten bulego askotan arratsaldeko zerbitzua ere eskainiko dute, baina ez asteko egun guztietan. Helburua da uztailaren 12ko hauteskundeetara begira posta bidezko botoa emateko aukera erraztea.
Bizkaian 36 bulego daude arratsaldez lan egiten ez dutenak, eta bihartik aurrera astean behin edo bitan arratsaldez ere irekiko dute. Gipuzkoan, berriz, normalean goizez bakarrik lan egiten duten 26 bulegotan hasiko dira arratsaldez ere lanean. Esandako moduan, ez dituzte arratsaldero ateak zabalik izango, astean behin edo birritan baizik. Eta, Araban sei bulegok egingo dute gauza berbera. Horrekin batera, botoa ematea soilik gura dutenendako leihatila bereziak jarriko dituzte, tramitea azkartu eta jende pilaketak ekiditeko.