Bederatzigarren eguna du gaurkoa Patxi Ruiz presoak gose eta egarri greban eta hainbat dira espetxe ezberdinetan zein kalean elkartasuna adierazteko ekimenak. Hala, bailaran ere elkarretaratzeak deitu dituzte gaurko, 20:30ean, Arrasate eta Bergarako plazetan.
COVID-19 gaitzak espetxeetako ondorioak "larritu" dituela salatu dute eta testuinguru horretan, Murtzia II-ko 8. moduluko presoek protestak hasi zituzten aurreko asteetan, hainbat neurri eskatzeko: "Protesten buru izatea egotzita, Patxi Ruiz preso politikoari mehatxu egin zioten espetxeko zuzendaritzak eta kartzelazainek. Hala, babes judiziala eskatzeaz gain, gose eta egarri greba abiatu zuen Ruizek, eta ebakiak ere egin zituen besoan".
Egoera "larrian"
Gogorarazi dute, Patxi Ruiz osasun egoera "larrian" dagoela; "Giltzurrunetako min handia du eta 14 kilo galdu ditu. Gainera, konfiantzazko medikuekin egoteko aukera ukatzeaz gain, espetxeko medikuak ez dizkio emandako frogen emaitzak".
Jakinarazi dutenez, Murtzia II espetxeko zuzendari Jesus Hernandezekin biltzea eskatu dute preso politikoaren abokatuek. Horren aurrean, zuzendariak horretarako "inolako asmorik" ez duela erantzun diela zehaztu dute. Azaldu dutenez, abokatuak herenegun izan ziren Ruizekin, eta "ahul" ikusi zuten. Gainera, jakinarazi dute ikusmenean "zailtasunak" izaten ere hasia dela.