Ni.eus euskarazko e-mail zerbitzua sortu dute

Ni.eus posta elektronikoak pertsonen arteko harreman digitaletan .EUS domeinua erabiltzea ahalbidetzen du, eta sortzaileen esanetan "euskaratik eta euskaraz" sortutako posta zerbitzua da; bezero-arreta, web interfazea, laguntza dokumentuak eta bezero-gunea eskaintzen ditu euskaraz.

PuntuEUS Fundazioak eta Guebs enpresak  ni.eus e-mail zerbitzua sortu dute, eta Euskarazko Interneten Eguna horrela ospatzea proposatu dute. Azaldu dutenez, pribatutasuna errespetatzen duen euskarazko .EUS e-mail zerbitzua da sortu dutena. Igande honetan, maiatzak 17, ospatzen da Interneten Nazioarteko Eguna; osasun larrialdia dela-eta, aurrez aurreko ekitaldirik ez da egongo, baina zerbitzu berria "eskuratzea" ahalbidetu nahi dute.

Zerbitzua Interneteko erabiltzaile euskaldunei zuzenduta dagoela azaldu dute sortzaileek –norbanako, elkarte zein enpresentzat–, eta urtea amaitu aurretik milaka e-mail kontu sortzea espero dute. Gainera, "pribatutasuna bermatuko" duela azaldu dute, izan ere, ez du iragarkirik ez, trackingik ezta komunikazio zifraturik ere: "Zerbitzuaren bereizgarrietako bat, beste zerbitzu batzuekin alderatuta, pribatutasuna da. Ni.eus posta zerbitzuak erabiltzaileen datuen pribatutasun eta segurtasuna bermatzen du: iragarkirik ez, trackingik ez eta komunikazio zifraturik; ez du inolako iragarkirik erakusten ezta erabiltzaileen erabileraren inolako jarraipenik egiten ere". 

Bestetik, jakinarazi dutenez, "nonahi" erabil daiteke; sakelako telefonoan edo ordenagailuko posta programan konfiguratu daiteke eta online webmail bidez erabiltzeko aukera ere ematen du. Horrez gain, beste zerbitzu batzuk eskaintzen dituela ere azaldu dute: "Zerbitzu osagarriak ere eskaintzen ditu: egutegia, helbide-liburua, berbideraketak eta askoz gehiago".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.