Eibarko emakumezkoen taldeak Iberdrola ligan jokatuko du datorren denboraldian. Espainiako Futbol Federazioko presidente Luis Rubialesek lurraldeetako federazioei jakinarazi die futbol ez-profesionaleko liga guztiak bertan behera uzteko proposamena egingo diola Zuzendaritza Batzordeari. Bihar, egubakoitza, Ordezkarien Batzordean berretsiko dute erabaki hori.
Uxue Iparragirre antzuolarra eta Eider Egaña oñatiarra. Argazkia: Eibar SD.
Proposamen horretako ondorio nagusietako bat izango da Eibar Lehen Mailara igoko dela. Berez, Athletic B dago lehen postuan, 48 punturekin, baina maila nagusian beste talde bat duenez, talde zuri-gorria ezin da igo, eta sari hori Iker Dorronsorok zuzentzen duen Eibarrek jasoko du. Talde armaginak 46 puntu zituen sailkapenean, pandemiaren ondorioz liga bertan behera geratu zenean.
Hala, azken tramitea egitea falta da, ordezkarien batzordeak erabaki berrestea, eta tramite hori beteta 2020-2021 denboraldian hiru euskal talde egongo lirateke maila gorenean: Athletic, Reala eta Eibar.
