Merinok dio, Jaurlaritzak proposatutako diru-laguntzak "aurrekontu itxia" duela eta berau amaitzean ez dela "laguntza gehiago egongo". Horrekin batera adierazi du, herritarrek hainbat baldintza bete behar dituztela laguntza jasotzeko eta baldintza batzuekiko desadostasuna ere agertu du: "Laguntza eskatu aurretik bete beharreko baldintzetako bat da etxebizitza batean etenik gabeko urte bat bizi izatea. Hiri handietan bizi diren familia askok esate baterako, hainbat arrazoiengatik etxebizitzaz sarri aldatu behar izaten dute eta horrek laguntza jasotzea eragotziko die".
Etxebizitza "eskubide bat"
"Legeak adierazten duen moduan, etxebizitza eskubide bat da", adierazi du Merinok eta aipatu du, Jaurlaritzak arlo horretan "laguntza ekonomiko urriak eta diskriminatzaileak" eskaintzen dituela, "etxebizitzak pribatizatzen" dituen bitartean. Horregatik, Jaurlaritza etxebizitza publikoak eratzeko gai izan behar dela dio, herritarrek etxebizitza duin bat izateko eskubidea dutelako.
Etxegabetzeen egoera
Alarma egoeran etxegabetzeak gauzatu ezin badira ere, Merinok Debagoieneko egoera zein den azaldu du: "Egoera ez da txarra, ezta ona ere. Arrasaten esate baterako, lau kasu daude, baina alarma egoeragatik ezin dira gauzatu". Horrekin batera, banketxeek azkenaldian hartutako jarreraz mintzatu da: "Banketxeak estrategia aldatzen hasi dira, jabeekin negoziatuz, baina beti beraien mesedetan negoziatzen dute".
Hipoteka eta alokairua
Merinok epe-laburrera familien egoera zein izango den azaldu du: "Uztailean edota irailean, familia askok ez dituzte diru-sarrerak izango eta horregatik ezingo dituzte hipotekak eta alokairuak ordaindu. Etxebizitza pribatuetan, alokairuan bizi diren familiek, jabearekin negoziatu beharko dute alokairuaren prezioa, baina orokorrean, ez ordaintzeak areagotu egingo dira".