MONDRAGONek iaz sustatutako Humanity At Music-Sinfonia kooperatiboa egitasmoan parte hartu zuten aipatu hiru abesbatzak berriro elkartu dira elkartasun proiektu honetan; guztira 100 bat pertsonak hartu dute parte ikus-entzunezkoan, euren etxebizitzetan grabazioak eginez.
Aretxabaleta abesbatza, Goikobalu abesbatza eta IBA abesbatzez gain, beste hainbatek ere parte hartu dute omenaldian; besteak beste: Jon Maya dantzariak, Maite Olmos piano-joleak, Ernesto Maestro musikariak, Jon Sarasuak, Fernando Velazquez konpositoreak eta Arteman Komunikazioak.
Bideoan bertan honela azaltzen dute omenaldiaren helburua: "Maite ditugun pertsona gehiegi eraman ditu COVID-19ak, eta horien artean gure nagusiak. Gaur garena eta dugun guztia haiei zor diegu eta orain ezin agurrik esan guk nahi bezala. Horregatik omendu egin nahi ditugu eta haien familiakoekin egon".
