Eider Mendoza foru bozeramaileak jakinarazi duenez, eguneko balantzeak 11 hildako utzi ditu Gipuzkoako adineko pertsonen egoitzetan. Hala, atzo baino sei lagun gehiago hil dira gaurkoan egoitzetan. Hain zuzen ere, Gipuzkoako adinekoen egoitzetan hil diren hamaika lagunetako sei Debagoieneko zentroetan zendu dira gaurkoan; bost Iturbide egoitzan eta bat GSR Aretxabaletan.
Gipuzkoan 67 hildako guztira
Aldunditik emandako datuen arabera, gaur arte, guztira, 5.424 pertsona hartzen dituzten Gipuzkoako 65 egoitzetan 67 pertsona hil dira eta une honetan 275 koronabirus kasu positibo daude. Bada, azken heriotzak GSR Aretxabaleta egoitzan, Arrasateko Iturbiden, Hondarribiako Caser Residencial Betharramen, Ordiziako San Josen, Donostiako Berran eta Tolosako Iurreamendin gertatu dira.
Zortzigarrena Iturbiden, lehena Aretxabaletan
Debagoieneko kasuei dagokienez, Iturbide egoitzan gaur zendu diren bost adinekoekin zortzi dira guztira bertan hildakoak; adineko bana hil ziren atzo, martxoaren 28an eta martxoaren 31n . GSR Aretxabaleta egoitzari dagokionez, bertan hil den lehen egoiliarra da gaurkoa, atzo egoitza berean lehen kasu positiboa baieztatu ostean.
