Covid-19ak eragindako osasun larrialdiaren aurrean, ezaugarri bereziak edukiko ditu 2020ko Aberri Egunak. Ikurriña erreferentzia moduan hartuta, alderdi politikoek deialdi ezberdinak egin dituzte, euren afiliatuen artean.
EAJk Euskadi aurrera. Lortuko dugu! leloarekin egin du deialdia. "Koronabirusarekin hil diren pertsonak oroitzeko eta pandemiaren aurka lehen lerroan ari diren langileei esker ona adierazteko" eguna izango dela aipatu du EBBko presidente Andoni Ortuzarrek. Gaineratu du, alderdi jeltzalearen lehentasuna "herritarrak zaintzea eta babestea" dela. Domekako Aberri Eguna "berezia" izango dela azpimarratu arren, aurreko urteetan moduan, oraingoan ere, ikurriña balkoietan zintzilikatzeko gonbita egin die herritarrei.
Mosaiko erraldoia
Bestalde, Euskal Herria Batera kolektiboak etxeetatik ospatzeko deia egin zuen apiril hasieran, "elkarrekin kantuan eta argazkiekin mosaiko erraldoi bat osatuz". Hori horrela, ikur bateratua osatzeko, bakoitzak bere desioak adieraziz egindako argazkiekin mosaiko digital erraldoi bat osatzea proposatu dute, Aberri Egunean bertan sare bidez zabalduko dena. Era berean, Euskal herritarrak kantuan jartzeko deia ere egin dute: "denok batera kantuan egingo dugu, egun eta ordu berean euskal irratien emankizun bereziari jarraituz". Balkoi, leiho eta etxeak ikurrinez eta Nafarroako banderez apaintzeko deia ere egin dute.
Ekimen horrekin bat egin dute EH Bilduk eta EH Baik. "Euskal jendarteari igandeko ekimenean parte hartzeko" deia egiteaz gain, krisi sanitarioaren ondorioz sortutako elkartasun keinuak balioan ipini dituzte. "Etxeetako balkoiak eta leihoak elkartasun eta aldarrikapen gune bilakatu dira ezinbestean: osasun arloko langileen txalotzeko, indar okupatzaileen salatzeko, beste jendarte baten aldarrikatzeko, euskal presoei elkartasuna adierazteko... Birusak ez du eteten Euskal Herrian borrokarako grina", esan dute kaleratutako oharrean.
Irrintziak
Azkenik, Podemos Euskadik, domekan, 20:00etan, balkoietara txalo egitera irtengo diren herritarrei irrintzi egiteko eskatu diete. "Irrintzi eginez beraien koloreaz, erlijioaz, generoaz edo jatorriaz harago, pertsona guztiak aberri hori posible egiten dutela aldarrikatzeko; herritar garrantzitsuak eta beharrezkoak dira eta guztiok batera eraikitzen jarraituko dugu", esan du Euskadi Podemoseko lehendakarigai Miren Gorrotxategik.