"Bi hilabete igaro dira Zaldibarko zabortegia amildu zenetik. Bi hilabete, bi langileak, Alberto Sololuze eta Joaquin Beltran, zabor azpian desagertuta daudenetik. Bi hilabete, gure osasuna arriskuan jarri zutenetik. Bi hilabete, erantzule zuzenak egon arren, erantzukizunak inork bere gain hartu ez dituenetik. Dagoeneko ez dakigu nola esan. Nahikoa dela. Aski dela", adierazi dute plataformako kideek prentsa-ohar bidez. Eta eskatu dituzte zabortegian gertatu zenaren gaineko azalpenak eta argibideak: "Egun zabortegian lanean dauden langileen segurtasuna bermatu behar dutela. Erantzukizunak argitu behar dituztela eta Iñaki Arriolak dimititu behar duela. Hondakinen kudeaketa eredua aldatu behar dutela".
Etxean konfinatuta egon behar izan arren aldarrikapenekin bat egitera gonbidatu dituzte herritarrak, gaur, astelehena, 20:30ean: balkoietatik burrunba egin bost minutuz eta ondoren bi kandela (edo bestelako argiak) piztu Alberto Sololuze eta Joaquin Beltranen omenez.
Aldarrikapen argazkiak ondoren, sare sozialetara igotzeko dei egin dute: #zaldibarargitu, #joaquinetaalbertogogoan eta zaldibarargitu@gmail.com.