Esparru akademikoko eta kultur alorreko 84 pertsona ezagunek izenpetu duten agirian, desagertutakoen senideei "elkartasuna eta babesik beroena" adierazi nahi izan diete.
Bestalde, erakunde publikoek araudien betetze mailan edota lizentzia kontzesioetan "zorrotz eta zuhurtziaz jokatu ezean", horrelako egoera "kontrolaezinak" sortzeko aukerak biderkatzen direla nabarmendu dute.
Manifestuan jaso dutenez, Zaldibarreko gertaerak "are gordinago" agertu du "trantsizio energetiko, ekologiko eta sozialaren beharra". Eta, trantsizioari kolektiboki ekiteko eztabaida publikoa gauzatzeko "une egokia" dela uste dute. Hori egin ezean, antzerako gertaerak errepikatzeko aukera dagoela ekarri dute gogora.
