Asier Illarramendi da salbuespena. Imanolek gainontzeko 22 jokalariak sartu ditu gaur Mirandesen kontra Realak jokatuko duen deialdirako, eta tartean dago Andoni Gorosabel arrasatearra. "Partidu historikoa da guretako, urte asko pasa direlako finalik jokatu barik", adierazi du Imanol Aguacil entrenatzaileak prentsaren aurrean. "Zaleak izugarrizko ilusioarekin daude, kopa izugarria jokatu dugu eta azkena falta zaigu".
"Bi gol beharko ditugu"
Reala garaipenaren bila zelairatuko dela argitu du oriotarrak, "ez dakigulako beste modu batean jokatzen. Eta gainera, uste dut gol askoko partidua izango dela, bi taldeek zelan jokatzen duten ikusita. Guk gutxienez bi gol egin beharko ditugu, eta mezu hori helarazi diet jokalariei". Taldeak Kopan egindako ibilbidean gol mordoa egin ditu, partidu guztietan egin ditu bi gol edo gehiago, eta Realeko entrenatzaileak uste du Anduvan ere horretarako kapaz izango direla. Nahiz eta garbi duten partidu gogorra izango dela.
Mila realzale Anduvan
Realeko zale kuadrilla polita joango da gaur Anduvara. Zaleek zailtasun handiak izan dituzte sarrerak lortzeko eta guztira mila lagun inguru batuko dira Mirandan. Eta, tartean egongo dira Debagoieneko zaleak.