Musika eta dantza urbanoekin beteko da Ibarra kiroldegia, zapatuan izango den Fun Dantz! jaialdian. Aurtengoa, seigarren edizioa izango da, eta beste behin ere, dantzariak dena ematera aterako dira agertokira. Euskal Herriko dantza urbano talde onenen koreografiekin gozatzeko aukera izango dute ikusleek. Interesa dutenek gaur erosi ahal izango dituzte sarrerak hiru eurotan, Arkupe kultura etxean; egunean bertan, berriz, bost eurotan salduko dituzte kiroldegiko leihatilan.
Ateen irekiera 18:00etan izango da, eta 18:30ean, epaileen ikuskizuna. Sara Colas, Paula Perez eta Alberto de Gregorio dantzariek saioa eskainiko dute, eta gero, epaile moduan arituko dira. Taldeen dantza maila baloratuko dute, baita sinkronia, ideia originala, eta erabilitako musika ere. 18:40ean, berriz, gazteen kategoriako koreografiak izango dira, eta 19:15ean, kategoria absolutukoen koreografiak. Aurreikuspenak betetzen badira, 20:00etan amaituko da dantza urbanoen ekitaldia.
Aretxabaletako Udalak eta BreakOnStage jaialdiak elkarlanean antolatutako ekitaldiak 21 talde elkartuko ditu. Horiek, hiru minuturen bueltako koreografiak eskainiko dituzte, ikusleen gozamenerako.
Euskal Herriko hainbat lekutatik etorritako taldeak elkartuko dira Ibarra kiroldegian jarritako oholtza gainean; besteak beste honako hauek: Feel The Sound (Bilbao), Bamboo (Donostia) Red Soul (Iruñea), Faktory (Leioa), Camden Town (Bergara), B-Wild (Barakaldo) eta Groove Stage (Gasteiz).
Bailarako ordezkaritza
Debagoieneko ordezkari bakarra izango da lehiaketan. Hain zuzen ere, Bergarako Camden Town dantza akademiako taldeek parte hartuko dute. Iaz, lau talde elkartu ziren; aurten, berriz, gazte mailan talde bakarrak eskainiko du ikuskizuna, eta absolutuan, aldiz, bi taldek dantzatuko dute.
Sari ederrak irabazleentzat
Gazteen edo urban dance junior deritzon kategorian, 15 urtetik beherako gazteak aterako dira agertokira ikuskizuna eskaintzera. Guztira, bederatzi talde izango dira, eta irabazleak BreakOnStage jaialdian parte hartuko du, martxoaren 21ean Bilbao Arenan. Bi talde onenek, berriz, sariak jasoko dituzte.
Kategoria absolutuan, berriz, 12 taldek parte hartuko dute, eta kasu horretan ere irabazlea BreakOnStage jaialdian egongo da. Bi talde onenak, aldiz, diruz sarituko dituzte.