Gazteen artean enpresen eta proiektuen sorrera bultzatzea da Mondragon Unibertsitateak abian jarritako ekimenaren helburua eta bigarrenez egin den lehiaketan 22 ikaslek hartu dute parte. Change maker edo aldaketa-bultzatzaile esaten dieten partaideek diziplina anitzeko taldeetan egin dute lan lau hilabetez, programaren erronkei aurre egiteko.
Orit izeneko aplikazioak irabazi du sari nagusia –1.000 euro–. Zaborretara botatzen den janaria gutxitzea da app horren helburua; horretarako, jakien trukea sustatu nahi du gazteen artean, batez ere 25 eta 35 urte bitartekoen artean. Trukatzeko prest dauden janarien berri ematen du horrek, jakiak botatzea saihestuz.
Bigarren saria –600 euro– Repera proiektuarentzat izan da. Itxuragatik dendetan saldu gabe gelditzen diren frutei eta barazkiei beste aukera bat ematea eta horiekin bestelako azken produktuak sortzea da proiektuaren funtsa.
Hirugarren saria –400 euro– BiPens proiektuak jaso du eta eguneroko otorduak eta hezkuntza uztartzen ditu. Haurrak protagonista izango diren jateko guneak sortzea proposatzen du. Elikadura, natura eta heziketa batzen dituen ingurunean, umeek irudimena erabiliko dute.
Chage Maker Lab ekimena
Bi ezaugarri nagusi ditu ekimenak: diziplinartekotasuna, parte-hartzaileak zenbait jakintza arlotakoak baitira, eta kokapen-aniztasuna, Mondragon Unibertsitateko fakultateak konektatzeko aukera ematen duena. Kimu Berrik babestu eta Gaztenpresak sustatutako programa da.