Minutu bateko isilunea egin dute partidua hasi aurretik Luis Mari Mujika Garitano Balento zenaren omenez –bergararra 1962-1963 urteetan Aloñako jokalaria izan zen–.
Partidu nahasia
Gaurko derbira puntu beharrean iritsi dira bi taldeak: Aloña lidergoari eusteko gogoz zetorren, eta Aretxabaletak beheko postuetatik aldentzeko puntu beharra zuen.
Lehenengo zatia nahasia izan da. Etxeko jokalariek izan dute baloiaren jabetza baina indarra eta abiadura falta izan zaie. Gol aukera bat edo beste izan dute, eta 35. minutuan Ander Bikuñak gola sartu du baina tantoa ez da markagailura igo epaileak jokoz kanpo adierazi duelako.
Aretxabaleta, bat gutxiagorekin
Bigarren zatian Aloñak hartu du baloiaren jabetza eta markagailuan aurretik jartzeko aukerak izan dituzte etxekoek. Aretxabaletarrek, euren aldetik, jokoari eustea lortu dute eta gola egiteko aukerak ere izan dituzte. Partiduko jokaldi aipagarrienak azkeneko minutuetan gertatu dira. Epaileak Aretxabaletako jokalari Ander Martinez egotzi du bi txartel hori erakutsi ondoren; eta, partidua etxekoen alde jarriko zela ematen zuenean, Aretxabaletaren gola iritsi da. 91.minutuan sartu du Yoel Berengerrek, Aloñako atzelarien huts nabarmenaren ondoren.
Oñatiarrak burumakur ziren, baina aurrera egin dute eta 97. minutuan berdinketaren gola lortu dute penalti bidez. Martxel Aiastui izan da golegilea.