"Emakumea bigarren planoan gelditu beharrean, gizonezkoekin batera aurrean" agertzeko aldarrikapena egingo du aurten ere Aresko emakume martxak. Eskoriatzatik Aretxabaletara izango da aurten ere eta aurreko hiru aldietan bezala herri bakoitzeko emakume bana omenduko dute. "Eskoriatzako kirol elkarteak, UDAk eta Aresko saskibaloi eskolako gurasoek hartuko dute erabakia baina proposamenak egiteko aukera otsailaren 22ra arte dago zabalik", dio Areskoko Maitane Dieguezek.
Martxa martxoaren 8an izango da. 11:00etan abiatuko da Eskoriatzatik eta 10:45ean egingo diote Eskoriatzako emakumeari omenaldia. Aretxabaletakoari berriz, martxa amaieran, 14:00ak aldera egingo diote bere herrian, Aretxabaletan.
Ibilbidean aldaketak
Egubakoitz iluntzean egin zuten laugarren Aresko emakume martxaren aurkezpena Eskoriatzako Ibarraundi museoan eta han aurreratu zuen aurtengo ibilbidean aldaketa batzuk egongo direla. "Eskoriatzako plazatik abiatuko gara eta handik liburutegi aldera egingo dugu. San Pedro auzotik Intxaurtxuetara joango gara eta han bidegorrira pasako gara Aretxabaleta aldera joateko. Han, Aretxabaletan, errepide orokorra hartu beharrean atzeko aldetik joango gara, ibaia dagoen aldetik", azaldu du Dieguezek.
Izen-ematea
Martxan parte hartzeko izen-ematea zabalik dago dagoeneko; otsailaren 22ra arte eman ahal izango da. Izena ematerakoan egunean bertan opari jasoko duten nikiaren taila jarri beharko dute parte-hartzaileek. Inskripzioa bost euro da. Aretxabaleta zein Eskoriatzako kiroldegietan eman daiteke izena.