Garaipen polita lortu zuen etxean atzo Leintz-Arizmendi taldeak. Zarautz taldea izan zuten aurrez-aurre, eta lehen zatian indarrak nahiko parean izan zituzten bi taldeek. "Zarauztarrak partidua eustera zelairatu ziren, eta lehen zatian nahiko ondo bete zuten helburua. Ez ziguten apenas aukerarik sortu, baina ondo aritu ziren defentsa lanetan" azaldu du Andoni Ezkurra entrenatzaileak. Penalti bati esker aurreratu ziren etxekoak, Olatz Legardak hamaika metroetatik asmatu eta gero. 1-0eko markagailuarekin heldu ziren atsedenaldira, eta bigarren zatia hasteaz bat etxekoek azeleragailua sakon zapaldu zuten, hiru puntuak poltsikoratzeko.
Lehen ordu laurdenean hiru gol sartu zituzten, mahai gainean kolpea emanez, eta aurkarien lehiatzeko grina zulatuz. Hauek izan ziren golegileak: Maider Isasmendi, Lide Zubiaga eta June Ugarte. Lau goleko abantailarekin partiduak intentsitate baxuagoa hartu zuen, eta hala heldu ziren partidu amaierara arte. Azken minutuan, ordea, bosgarren aldiz zulatu zuen zarauztarren atea, Nerea Dorronsorok sartutako golari esker.