Enplegu Azokak enpresen eta langabezian dauden pertsonen arteko zubia izan nahi du. Eskualde mailako ekimena izango da eta enpresak eta lan bila ari diren pertsonak elkartu nahi ditu; bakoitzaren beharrak eta eskaintzak partekatzeko asmotan. Enpresek eta erakundeek euren negozio ereduak azaltzeko baliatuko dute otsailaren 13an eta 14an egingo den azoka; eta negozio eredu horiek garatzeko zein profiletako pertsonen beharra duten zehaztuko dute. Bestetik, lan bila ari diren pertsonek enpresen aurrean hautagaitza eta profila azaltzeko aukera izango dute.
Stand ezberdinetan kokatuko dira azokan parte hartuko duten enpresak, eta bertan garatuko dituzte jendearekin hartu-emanak. Curriculumak ere jasoko dituzte gainera, eta enpresak beraiek euren balio proposamenei buruzko aurkezpen txikiak egiten jardungo dira, "etorkizuneko langileak" erakartzea helburu.
Laguntza tailerrak
Azokaz gain, hainbat ekintza antolatu dituzte mankomunitatetik. Urtarrilaren 27an enpresei zuzendutako tailerra egingo dute, talentua nola erakarri ikasteko asmoz. Enpresek euren aurkezpenak modu egokian nola garatu beharko lituzketen azaldu nahi dute tailerretan.Pertsonei zuzendutako tailerra ere egingo dituzte, norberaren burua enpresaren aurrean nola aurkeztu ikasteko. Herri ezberdinetan egingo dute hori, otsailaren 3an Oñatin; 4an Bergaran, eta 5ean, azkenik, Arrasaten. Informazio gehiago nahi izanez gero, www.debagoiena.eus/enpleguazoka.