Erdigunean ez ezik auzoetara ere eraman dute gaurkoan grebarekin bat egiteko aldarria. Arrasateko feministak 11:00etan abiatu dira Biteri Plazatik eta Musakolara egin dute lehenengo eta behin. Arrasateko trikitixa eskolakoen doinuek lagunduta eta hainbat aldarrikapen soinean zituztela egin dute bidea. Gelmako biribilgunean elkartu dira Sambamaña batukadarekin eta danbor hotsek ere lagundu dute deialdia ozenago egiten.
Bergaran ere auzoz auzo ibili dira. Kartelak pegatzen eta informazioa banatzen aritu dira Martxanterak taldeko ordezkariak. Bolu auzoan hasieran eta Poligonoa, ondoren. Bergararrak ere greba egitera deitu dituzte eta baita ere urtarrilaren 25ean Elorregin egitekoa den bailara mailako ekitaldian parte hartzera.
Oñatiko feministek agerraldia egin dute 13.00etan Foruen Plazan. Grebarekin bat egiteko deia luzatzeko talde argazkia atera dute. Pankarta baten bueltan atera dute argazkia hainbat emakumek. Pankartan Greba orokorra feminista izango da irakur zitekeen. Aste osoan zehar hitzaldiak eta dokumental baten emanaldia ere izango direla gogorarazi dute.