Bergaran ibilbide berriarekin
Lasterketaren seigarren edizioa ibilbide erabat ezberdinarekin dator. "Ez du oraingoarekin zerikusirik izango, Bergarako beste auzo batera eramango ditugu-eta korrikalariak, San Migel auzora", diote antolatzaile taldekoek. Distantziari (7 km) eta desnibelari (300 metro) dagokionez, baina, apenas dago aldaketarik: "Herri mailako izaerari eutsi gura izan diogu". Iaz baino 100 lagun gehiago hartuko dituzte aurten: "Bakarkako izen-ematea segituan agortu zen; bikoteka oraindik 20 dortsal inguru geratuko dira. 450 lagunendako tokia dugu, gehienez". Hala, lasterketa aurretik (12:00), aurten hil den Anselmo Gomez taldekidea omenduko dute, eta 11:30ean, San Silvestre Txiki solidarioa ere izango da: "Gaztetxoei proban parte hartzeko eskatuko diegu gozoak ekartzeko, turroiak... Elikadura Bankura eramango ditugu gero".
Eskoriatzan, brindisa eta gero
San Silbestradien 12. edizioa eta Manuel Muñozen 9. Milia. 11:00etan hasita haurrendako lasterketak egingo dituzte. Gero, 17:30ean, korrikalariek xanpainarekin brindisa egingo dute, eta 18:00etan hasiko da proba. Mozorro onenak saria izango du.
Aretxabaletan ere, jai giroan
Antolatzaileek dei egin dute mozorrotuta korrika egiteko: 16:45ean, umeen lasterketa izango da; eta 17:00etan, helduena. Durana kalean hasi eta amaituko da lasterketa.
Musakolakoa, bigarrena
Arrasaten goizean egingo dute San Silvestre lasterketa, Musakola auzoan. 12:00etan abiatuko da 5,2 kilometroko proba, Legarra plazatik. Egunean bertan eman beharko da izena, doan. 16 urtetik gorako herritarrek eman ahal izango dute izena, 11:00etatik aurrera. Horretarako mahaia Legarra plazan egongo da, Ziar-Ola elkartearen ondoan.