Ordua zen ohorezko erregional mailako hiru taldeek emaitza positiboa batzeko, eta joan den astean egin zuten hori, bai Aretxabaletak (0-1, Añorgan), bai Mondrak (3-2, Elgoibarren kontra) eta baita Bergarak ere (3-1, Oiartzunen kontra) garaipena eskuratu zutelako. Hala, asteburu luze honetan Aretxabaleta izango da etxean jokatuko duen ordezkari bakarra, eta atzealdean dabilen Touringen bisita izango du Ibarran (domeka, 16:30). Aretxabaletarrek partidu bakarra irabazi dute Ibarran, eta domekan dute bigarren garaipena batzeko aukera ederra.
Mondrak gaur, Bergarak bihar
Mondrak gaur, eguena, jokatuko du, Añorgaren zelaian (21:15). Bosgarren dago talde donostiarra, baina azken jardunaldietan bolada txarrean dabil. Eta bihar, egubakoitza, jokatuko du Bergarak, Deban (16:30); seigarren dago Amaikak Bat taldea.