Jostailuak "eskura" ez dituzten haurrei laguntza emateko asmoz, jostailu berrien bilketa egiten ari dira egunotan, eta horretarako herritarren eta bestelako erakundeen laguntza behar dutela azaldu du Gurutze Gorriak. "Jostailua haurren garapenerako beharrezkoa den elementu bat izan arren, gaur egun, tamalez, eskubide hau ez dago haur guztien esku".
Hurrengo bilketa, etzi
Orain arte jostailuak biltzen aritu diren arren, gehiago biltzen jarraitu gura dute datozen egunetan, jendea oraindik ez delako "mugitzen" hasi, Gabonetako erosketak egiten hasteko "goiz" delako. Arrazoi horregatik, datozen egunetan jostailuak biltzen jarraitzea espero dute. Hain zuzen, etzi, zapatua, izango dute debagoiendarrek bilketa horretan parte hartzeko hurrengo aukera, Arrasateko Eroskin izango baitira Gurutze Gorrikoak, eurek azaldu moduan: "Debagoieneko gizarte bazterkeria arriskuan aurkitu daitezkeen 0 eta 12 urte bitarteko haurrentzat arituko gara jostailuak jasotzen". Bete beharreko baldintza bakarra jostailuak berriak izan daitezen da.
Etzi ez ezik, datorren zapatuan ere leku berean izango dira, bilketarekin jarraitzea helburu. Kanpainak iraun bitartean, hiru modutara lagundu ahal izango da, gainera, jostailu berriak erosi eta emateaz gain, jostailutxekeak erosteko aukera ere badago eta. Hala, modu horretako laguntza eman nahi duenak 5, 10 edo 20 euroko txekeak erosi ditzake Eroskin bertan jarriko duten postutxoan, eta ondoren, Gurutze Gorria arduratuko da bildutako diru kopuruarekin "beharrezkoak" diren opariak erosteaz. Azkenik, ekonomikoki laguntzeko beste bide bat ere ahalbidetu dute. Laboral Kutxako ES22 3035 0001 51 0010018156 zenbakian norberak nahi duen diru kopurua sar dezake; horretarako, kontzeptuan JOSTAILUA 2019 jarrita.
250 haurrentzako laguntza
Gurutze Gorriak jakinarazi dutenez, aurten Debagoieneko 250 haurrek eskatu dute jostailu berri bat. "Gizarte Zerbitzuek ematen digute informazioa, beraiek baitira familien eskaerak jasotzearen arduradunak".
Iaz egindako jostailu berrien bilketak arrakasta handia izan zuen. "Debagoieneko 199 haurren ametsak betetzeko nahiko jostailu batu genituen", diote.
Gabonetan haurrik jostailurik gabe gera ez dadin, proiektuan parte hartzera animatu nahi dute jendea. Diotenez, guztion "eskuzabaltasuna" beharrezkoa dute eskubideen aldeko borrokan.
