2019an Berroeta SC gaztandegian ardi esne gordinez prestatutako gazta onduetan topatu dute listeria monocytogenesa eta, prebentzio moduan, gaztandegiko produktu guztiak kendu dituzte salmenta tokietatik. Tokiko merkatuetan, Gipuzkoako harategietan eta Bizkaiko harategi batean zegoen banatuta gazta sorta hori.
Jakinarazi dute, epidemiologia zerbitzuek ez dutela produktu horien kontsumoarekin lotutako inolako listeriosi kasurik ezagutu oraingoz. Eta gaineratu dute, zaintza berezia abiatu dutela edozein kasu susmagarriren aurrean. Hori horrela, Osasun Sailak gomendatu du etxean gazta hori izanez geo ez kontsumitzeko eta erosketa puntura itzultzeko; eta gazta kontsumitu ondoren sintomatologiarik izanez gero, bereziki pertsona immunodeprimituen, haurdun dauden emakumeen eta paziente onkologikoen kasuan, osasun zentrora joatea.
