Debagoieneko Enplegu Azokan izena emateko epea luzatu dute

2017ko Enplegu Azokako standetako bat.

2020ko otsailaren 13an eta 14an egingo dute Debagoieneko Enplegu Azoka. Bertan parte hartu nahi duten enpresek aurrez eman beharko dute izena, eta, hasiera batean horretarako epea gaur amaitzen zen arren, azkenean, abenduaren 13ra arte luzatu dute, enpresa gehiagok parte hartzeko aukera izan dezaten.

Lan-orientazioa@debagoiena.eus helbidera idatzi behar dute parte hartu nahi dutenek. Debagoieneko Mankomunitateak lehenengoz antolatu du azoka –aurreko urteetan ere egin izan da, baina ez du Mankomunitateak antolatu–. Garaia Parke Teknologikoan egingo dute azoka, eta enpresentzako eta herritarrentzako prestakuntza saioak, lan bitartekaritza zerbitzua eta lan orientazioa uztartuko dituzte bi egunetan.

Enpresei dagokienez, erakargarritasuna hobetu eta talentua erakarri eta mantentzea izango dute helburu, baita enpresen beraien online presentzia hobetzea ere. Horretaz gain, lan bila aktiboki ari diren pertsonen eta enpresen arteko gune bilakatu nahi dute azoka, hala, hautaketa prozesuak erraztu daitezen.

Enpresek, egiteko ugari

Bertan jarriko dituzten standetan egongo dira enpresetako ordezkariak; eta gerturatzen diren herritarren profilak ezagutu eta curriculumak jasotzeaz arduratuko dira. Lan elkarrizketak ere gauzatuko dira: aurretiko hitzorduarekin zein gabe. Horretaz gain, enpresek beraien balio proposamena azaldu ahal izango diete gerturatzen direnei.

Azokako egunetan ez ezik, Mankomunitateak ekintza gehiago antolatu ditu enpresetara begira. Azokaren aurretik, talentua nola erakarri lantzeko tailerra egingo dute. Azokaren ondoren, bestalde, enpresekin topaguneak antolatuko dituzte, eta enpresen online presentzia hobetzeko estrategiak garatuko dituzte, besteak beste.

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.