Joan den astean Elgoibarren lortutako puntua borobiltzeko, garaipenaren bila kantxaratuko dira aretxabaletarrak domekan (Ibarra, 16:30). Adi, baina, lesakarrekin, azken lau partiduetatik hiru irabazi dituztelako eta bestea berdindu. Mondrak eta Bergarak, berriz, kanpoan jokatuko dute. Joan den astean, ondo erreakzionatu zuten bi taldeek, etxeko lehen garaipena lortuta. Bergararrek zortzigarren dagoen Mutrikuren zelaian jokatuko dute (zapatua, 16:30) eta Mondrak Hernanin erronka polita izango du (zapatua, 16:30), talde horrek partidu bakarra galdu du-eta etxean.
Aloña Mendi, lider
Jokatutako hamar partiduetatik zortzi irabazita Aloña Mendi sailkapeneko lehenengo postuan dago, Beasainekin berdinduta. Bi talde horiek datorren astean jokatuko dute elkarren kontra, baina lehenago, oñatiarrek Orion jokatu behar dute (zapatua, 16:00). Antzuolak, berriz, bosgarren dagoen Billabonaren bisita izango du bihar Estalan (16:00).