Aitor Mendizabalek datorren asteburuan, hilaren 30ean, jokatuko du Aspeko pilotari moduan azken norgehiagoka. Tolosa izango du ondoan, eta Etxeberriaren eta Bikuñaren kontra neurtuko dituzte indarrak, eskuz binakako txapelketako partiduaren atarian. Jaialdi erakargarria da oso, eta harmailak goraino beteta daudela esan ahal izango du Antzuolako aurrelariak agur –ikusteko dago erabateko erretiroa hartuko duen ala beste enpresa batekin jarraituko duen–. Seguru, gainera, herrikide asko ondoan izango dituela, debutaren egunean, 2011ko irailaren 17ko hartan Zarauzko Aritzbatalde pilotalekuan izan zituen moduan.
Urte hartan, hain zuzen, Antzuolakoak Bigarren mailako Lau eta Erdiko txapela jantzi zuen, amateur mailan erakutsitako lan onari jarraipena emanda –2007an Elgetako Lau eta Erdikoa eta DV Torneoak irabazi zituen–. Hala, Aspeko kirol zuzendari Jokin Etxanizek antzuolarraren aldeko apustua egin zuen; fisikoki, beste pilotari batzuekin alderatuta desabantaila zuen. Baina, azkartasunak, eta bereziki kantxan erakusten zuen amorruak eta lanerako jarrera onak parekatu egiten zuten balantza.
Hain zuzen, profesional mailan 2016a gorriz markatuta izango du antzuolarrak, orduan irabazi zuen-eta bigarren mailako Buruz Buruko txapela, eta horrek lehenengo mailako txapelketako ateak ireki zizkion.
Urte hauetan pilotari profesional moduan jardun du Mendizabal III.ak, eta irakasle moduan ere badabil irakaskuntzan lanean.
