'Hizkuntza Eskubideen Protokoloa: Udal Garapena' gida aurkeztu du Kontseiluak

Udalen hizkuntza-politika eraginkorrerako tresna "egingarria eta eragingarria" partekatu du gaur, azaroak 7, Kontseiluak euskalgintzako, instituzioetako eta era askotako eragileen artean. Gasteizko Euskararen Etxean, Oihanderren, izan da ekitaldia eta Debagoieneko ordezkari asko elkartu dira han.

Paul Bilbaok, Kontseiluko idazkari nagusiak, aurkeztu du gida: "Euskalgintzak eta udalak elkarrekin jarduteko bitartekoa, politikatik gobernantzara jauzia egiteko tresna da". Euskalgintzako, Jaurlaritzako, Aldundiko, Uemako eta Udalbiltzako ordezkariak, eragile sindikalak eta politikoak, eta hainbat udaletako teknikariak elkartu dira gida hori ezagutzeko, besteak beste, Elgetako alkate eta Uemako presidente Iraitz Lazkano, Aramaioko alkate Lierni Altuna, Bergarako Udaleko Euskara teknikari Estepan Plazaola, Leintz Gatzagako ordezkari Jon Zuazabeitia eta Gipuzkoako Foru Aldundiko Hizkuntza Berdintasuneko zuzendari ohi Mikel Irizar.

2016an aurkeztutako Hizkuntza Eskubideak Bermatzeko Protokoloan oinarrituriko dokumentua da gaur aurkeztutakoa. Ildo horretatik, Paul Bilbaok azaldu du tresna berriak Protokolo nagusiaren balioak dituela oinarri: Hizkuntza-eskubideen aitortza, araudi egokia, neurri zuzentzaileak hartzea, baliabideak bermatzea, neurri positiboak hartzea, hizkuntza-politikaren zehar-lerrotasuna aplikatzea…

Udalek "eskumen handiak"

Kontseiluaren ordezkariak tresnaren osagarriak azaldu dizkie elkartutakoei, eta, bi ideia nagusi azpimarratu ditu: batetik, Udalei adierazi die "hizkuntza-politikak garatzeko eskumen handiak dituztela, baita askatasun handia dutela ere urrats eragingarriak egiteko". Eta bestetik, Hizkuntza Eskubideak Bermatzeko Protokoloari egin dio erreferentzia, bere balioak gogoraraziz, eta nabarmendu du "errealitate desberdinei erantzun diezaiekeen tresna" izatea dela helburua: "Are gehiago, Udal Garapenak aukera emango du politika integralak planteatzeko edo-eta eremukakoak: hezkuntza (aisialdia, musika eskola…), onomastika, eremu sozioekonomikoa, hedabideak eta teknologia berriak eta kultura".

Bukatzeko, Bilbaok gogorarazi die eskubideen bermearen alde egiteak "harreman eta elkarbizitza-eredu demokratikoari" eragiten diola eta animatu ditu Udal Garapenak eskaintzen duen aukera berriarekin bat egitera.

GOIENA KLUBEKO BAZKIDETZA %30 MERKEAGO

Goiena Komunikazio Taldeko hedabideek lehentasunezko mezenasgo jarduera izendapena dute. Ondorioz, Goiena Klubeko bazkide baldin bazara zerga onurak ezarriko zaizkizu Goienari egin diozun ekarpenarengatik.

Goiena Klubeko bazkidetza kuota %30 merkatuko zaizu errenta aitorpena egiterakoan.

BAZKIDE EGITEKO, DEI EGIGUZU: 943 25 05 05 edo egin klik hemen.


Zerga onurak izateko datuak bete