Kataluniarrei elkartasuna adieraztera deitu dituzte ikasleak zein langileak

Ikasleek geldialdiak egin dituzte gaur, eguena, eta elkarretaratzeak ere bai Ernaik deituta. Bihar, urriak 18, ostera, sindikatuek deituta –ELA, LAB, STEILAS, ESK, Etxalde eta Hiru– langileak aterako dira kalera, besteak beste, osasungintzan, hezkuntzan zein industrian dihardutenek.

Erreferenduma ez da delitua leloarekin deitu dituzte elkarretaratzeak eta lantokien aurrealdean elkartuko dira.
 
Debagoienari dagokionez besteak beste ekimen honetan parte hartuko dute: Debagoieneko ospitalea (10:30), Bergarako, Antzuolako, Eskoriatzako eta Oñatiko udaletxeetan (12:00) eta Arrasatekoan (12:15). Eta hainbat enpresatan, Garay, Arcelor, Elay, Chinchurreta, Polmetasa. Oñatiko Errekalde Herri Eskolako irakasle talde batek ere bat egin du deialdiarekin eta 16:30ean elkartuko dira ikastetxearen kanpoaldean.

 

Manifestaziorako deia

Procès-aren aurkako "epai bidegabeari" erantzunez manifestu bateratua plazaratu dute Euskal Herriko eragile politiko, sozial eta sindikaletako ordezkariek eta hainbat alorretako pertsona esanguratsuk. "Presoen askatasuna" aldarrikatu, konponbide politikoaren premiaz ohartarazi eta zapaturako Gure Eskuk deitutako manifestazioari babesa agertu diote. Hala, Askatasuna. Konponbide politikoaren alde manifestua aurkeztu dute gaur Donostiako Kursaalen.
 
EAJ, EH Bildu eta Ahal Dugu alderdiek bat egin dute manifestuarekin, baita ELA, LAB, Steilas, ESK, Hiru eta Etxalde sindikatuek eta Demokrazia Bai plataformak eta Erabakizaleak abokatuen elkarteak ere. Eragile horietako ordezkariez gain, bertan izan dira kultura arloko erreferenteak ere: Antton Telleria, Pilar Kaltzada, Danele Sarriugarte, Xabier Euzkitze eta Garbiñe Ubeda. Beste hainbatek, ostera, atxikimendua adierazi diote aurkezpenean egoterik izan ez badute ere: Juan Jose Ibarretxe lehendakaria, Bernardo Atxaga, Asier Illarramendi, Jule Goikoetxea, Paul Rios, Iker Irribarria, Fermin Muguruza, Irantzu Varela, Juantxo Arakama, Miren Amuriza, Alex Sardui, Pello Reparaz eta Zuriñe Hidalgo.
Erlazionatuak

Aloñako mendizerra argiztatzeko deia egin dute

Oñati

Aiako Harriak argiztatu duten moduan, Aloñako mendizerran gauza bera egiteko deia egin dute. Gaur, eguena, izango da. Bertara joateko 19:00t...

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.