Abisu horia tenperatura altuengatik
Tenperatura altuengatik ezarritako abisu horia 18:00etan amaituko da, ordura arte 36 graduko tenperaturak espero direlarik. Duela ordu bete, esate baterako, Arrasaten 38 graduko tenperatura neurtu da, baina kostaldean egoera guztiz ezberdina izaten ari da, hamar graduko aldea baitago. Hori da hain zuzen, Donostiaren kasua, 14:00etan, tenperatura 27 gradukoa zen.
Abisu horia euriagatik
18:00etatik aurrera euri zaparradak aurreikusi ditu Segurtasun Sailak eta horregatik abisu horia ezarriko du. Zaparradak Araba eta Gipuzkoan botako ditu bereziki eta txingorra ere egin dezake. Biharko, ez da aldaketa handirik aurreikusi eta abisu horia mantenduko da, zaparradak botako dituelarik Kantauri isurialdean bereziki. Tenperaturari dagokionez, aldaketa nabarmena izango da: bihar adibidez tenperatura maximoa 22 gradukoa izatea aurreikusten da Arrasaten, eta 20 gradukoa zapatuan.