Oñatin abiatuko da Gipuzkoako Bertsolari Txapelketa, irailaren 14an

Maialen Regueiro 2019ko uzt. 16a, 13:11
Saroi Jauregi, Pili Legarra eta Maria Jose Telleriak aurkeztu dute Asteasun txapelketa (Irudia: Gipuzkoako Bertsozale Elkartea)

Irailaren 14an abiatuko da aurtengo Gipuzkoako Bertsolari Txapelketa, Oñatiko Santa Ana Antzokian. Asteasun egin dute txapelketaren aurkezpena, Saroi Jauregi, Gipuzkoako Bertsozale Elkarteko lehendakariak, Pili Legarra, Asteasuko alkateak eta Maria Jose Telleria, Gipuzkoako Foru Aldundiko Kultura zuzendariak. 48 bertsolarik hartuko dute parte txapelketan, hiru debagoiendarrek, eta hamasei saio izango ditu.

48 bertsolari eta hamasei saio

Gipuzkoako Bertsolari Txapelketa irailaren 14an abiatu eta hiru hilabeteko iraupena izango du, hamasei saio izango dituelarik. Guztira 48 bertsolarik hartuko dute parte; horien artean izango dira Ainhoa Agirreazaldegi elgetarra, Maider Arregi oñatiarra eta Ane Zuazuabiskar arrasatearra. Finala, abenduaren 14an izatea aurreikusten da, Donostiako Illunben.

Saioak Gipuzkoan barrena izango dira: zazpi final-zortziren, bost final-laurden, hiru finalaurreko eta finala. Lehen saioa irailaren 14an izango da eta hortik aurrera, ia astero izango dira saioak, fasetik faserako asteburuetan izan ezik.

Bertsolariez gain, hamabost gai jartzaile, hamasei epaile eta lau idazkari eta laguntzaile ugari izango dira txapelketan lanean.

Sarrerak

Irailaren 2an jarriko dira salgai www.bertsosarrerak.eus atarian saio guztietako sarrerak. Bertsozale Elkarteko bazkideek sarreretan prezio berezia izango dute eta bonua eskuratzeko aukera ere izango dute, saio guztietarako balioa dutena, finalerako izan ezik.

Txapelketaren inguruko informazio, www.bertsozale.eus atarian izango da eta www.bertsoa.eus atarian berriz, txapelketaren jarraipen berezia egingo da.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak