Espedizioan parte hartuko duten 121 gazteek, 798 kilometroko egingo dituzte, Euskal Herria oinez zeharkatuz. Ibilbidea hainbat etapatan banatuta egongo da, lehena honako hau izango delarik: Maule-Pagola (uztailaren 2an), Pagola-Jutsi (uztailaren 3an) eta Jutsi-Garazi (uztailaren 4an). Ibilbideak ez dira maldatsuak eta luzeak izango, baina gogor xamarrak izan daitezke.
Horrez gain, parte-hartzaileek ibilbidearen %95a baino gehiago Donejakue bideko adarretan egingo dute: bide frantsesa Mauletik Vianaraino, barnealdeko bidea, Gesaltzatik Iruneraino eta kostaldeko bidea Baionatik Getxoraino.
Sare berria
Espedizio honen helburu nagusia da hain zuzen ere, neska-mutil euskaldunen sare berri bat sortu eta elikatzea. Horretarako, esperientzian zehar Belaunaldi arteko eguna izeneko bi ekimen izango dituzte non, EuskarAbenturak izan dituen bi ediziotako gazteak elkar ezagutuko diren.
Esperientzia nomada
121 gazteekin batera, esperientzia nomada biziko duten xerpa, osasun, komunikazio eta logistika taldeko 25 lagun arituko dira. Hala, espedizioan taldeka arituko dira, talde bakoitzak erreferentziazko begirale bat izango duelarik.
'EuskarAbentura' aplikazioa
Espedizioan parte hartu ezin izan dutenek, aplikazioaren bitartez jarraitu ahal izango dute bertatik bertara gertatzen dena. Codesyntax enpresak garatu du aplikazioa eta Android zein iOS gailutarako dago erabilgarri.
Espedizioa mapa batean proiektatuta egongo da, geolokalizazioari esker. Gainera, aplikazioaren bitartez, etapa bakoitzaren xehetasunak jakin ahal izango dira. Multimendia atala ere badauka aplikazioak, non parte-hartzaileen argazki zein bideoak erakutsiko diren. Horrekin batera, gazte bakoitzaren profil-fitxa ere egongo da ikusgai.
