Domekan Markinan jokatu zuten Euskadiko Txapelketa preziatua. Eta, amateur mailan lehenengo urtea egiten dabilen Andoni Azkarate arrasatearrak Gontzegaraigane mendatea jaisterakoan izan zuen erorikoa: "Azkar gindoazen eta nire aurretik zihoan txirrindulariak azkarregi hartu zuen zuzen baten ostean eskumatara zetorren kurba. Lurrera erori zen, kurbaren kanpoaldetik ahalegindu nintzen hura saihesten eta nire gurpilek ere irrist egiten zutela ikusi nuen. Bazter-babesaren oinarriarekin hartu nuen kolpea, eta kamisetatik zintzilik geratu nintzen".
Kolpea matrailezurrean, zauria belarrian, eta lepoan hasi eta bularrean amaitzen den ebakia ditu arrasatearrak. Txapa eta pintura, txirrindularien argotean, baina lepotik hasi eta bularreraino doan ebakiak erakusten du larriagoa izan zitekeela, bazter-babesak izugarri arriskutsuak direlako. Hain zuzen, horiek kentzeko eskaera egiten dabiltza txirrindulari eta moto gidari asko eta asko, eta horrexegatik egin ditu publiko David Etxebarriak argazkiok. Eta, dagoeneko asko dira babesa erakutsi dutenak.
Asteburuan hitzordu hirukoitza dute
Azkarate onik dago, sustoa baino ez da izan: "Bizikletan ez naiz ibili, atzo Besaidera joan nintzen oinez ibiltzera, eta gaur buelta bat emateko asmoa dut, ea gorputzak zelan erantzuten duen". Asteburuan Seguran, Berriatuan eta Tolosan lasterketak dituzte: "Zuzendariarekin berba egin ondoren ikusiko dugu ze lasterketetan har dezakedan esku. Seguru aldapa behera akordatuko naizela domekan izandako erorikoaz, baina emango diogu buelta".
