Bizitzaren omenez egin dute kantuan neska-mutikoek

Arizmendi ikastolak antolatutako Eskolarteko 31. Abesbatzen Topaketak bizitza aldarrikatu du aurten, Kantuz bizi naiz eta leloarekin. Bost talde elkartu ziren atzo Amaia antzokian, horietako lau Arizmendi ikastolakoak eta bat Oñatiko ikastetxeetako neska-mutikoek osatutakoa.

200 neska-mutiko baino gehiago igo ziren Amaia antzokiko oholtzara, eta dotore baino dotoreago abestu zuten jarlekuetan begira zituzten senideen eta lagunen aurrean. Arizmendi ikastolako Uribarri guneko Haur Hezkuntzakoek, Almeneko eta Gazteluondoko Lehen Hezkuntzakoek, Almen eta Gaztelupe guneetako DBH eta Batxilergoko ikasleek eta Oñatiko ikastetxeetako Lehen Hezkuntzakoek jardun zuten kantuan. Ekitaldia bukatu zuten Eskerrak bizitzari guztiek elkarrekin abestuta.