"Eskubideak gauzatzeko herri ekimenetik sortutakoa" dela nabarmendu du Elkarrekin Podemosek

Isabel Salud hizketan atzo Arrasaten, Elkarrekin Podemosen mitinean.

Elkarrekin Podemosek Arrasaten egin zuen atzo, astelehena,  Espainiako hauteskundeetara begirako kanpainako ekitaldia.

Rafa Sainz de Rozas eta Miren Gorrotxategi Gipuzkoako eta Bizkaiko zerrendaburuekin batera izan dira Isabel Salud Ezker Anitzeko idazkari nagusi eta Gipuzkoako zerrendetan seigarren doana, eta Igor Urizar koalizioaren Arrasateko alkategaia Udal hauteskundeetarako. Elkarrekin Podemos herri ekimenentzat bermea dela esan dute, "hortik sortua" delako.

"Herri ekimenak eta langileen borroka horren ondo" ezagutzen dituen Arrasate aukeratu du koalizioak kanpainako ekitaldirako. Sainz de Rozasek adierazi du Elkarrekin Podemos ez dela marketin produktu bat, ezta "partiduen estolderietan aritutakoa" ere; “eskubideak gauzatzeko herri ekimenetik sortutakoak” direla adierazi du. Horregatik, edozein aldarrikapen sozial edo politiko duenak zalantzarik izan beharko ez lukeela adierazi du. Eta gehitu du: "Akats asko egin ditugu, onartzen dugu, baina bando okerrean egotea ez digu inork leporatuko".

Miren Gorrotxategik, bestalde, ohartarazi du "demokraziaren kontrako munstroak" jaio direla bizi dugun koiuntura eta testuinguru sozio, politiko eta ekonomiko nahasi honetan. Eta dei egin die herritarrei hauteskundeetan parte hartzeko. "Guk geuk parte hartzen  ez badugu, beste batzuek erabakiko dute gure ordez" esan du.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.