Mondragon Assemblyk lantegi berri bat eraikiko du Txinan

Mondragon Assemblyk Txinan irekiko duen lantegiaren maketa.

3,5 milioi euro inbertituko ditu eta 2022rako 25 milioi euroko salmentak eta 180 langile izatea espero du. 12.000 metro koadroko lursail bat erosi du Qiandengeko industrialde berrian (Kunshan), eta 7.000 metro koadro inguruko lantegi bat eraikiko dute bertan. Eraikinak 6.000 metro izango ditu ekoizpen gunerako eta 1.000 metro koadro bulegoetarako. Espero da eraikitze lanak 2019aren erdialdean hastea eta 2020aren lehen lauhilekoan lantegia operatibo egotea.

Munduko erreferente

Automatizazioen eta eguzki energiaren sektoreetan munduko erreferente gisa sendotzeko beste urrats bat dela jakinarazi du Mondragon Assemblyko Txinako zuzendari orokor Mikel Gantxegik: "Urtetik urtera sendotzen ari gara merkatuan, eduki teknologiko handiko proiektuetako erreferente gisa. Lantegi berri honek hazten jarraitzea ahalbidetuko digu, bai eta barruan definitu ditugun eta egun ditugun bezeroek eta etorkizunean izango ditugunek Txinakoa bezain exijentea den agertoki batean lehiakorrak izaten jarraitzeko eskatu dituzten erronka berriei heltzea ere".