Korrika badator... Egin Klika Goienan!

Bihar hasiko da 21. Korrika eta Goienak gertuko jarraipena egingo dio beste hedabide batzuekin batera. Atari honetan kanal berezia du, eta hor, lekukoa uneoro non dabilen zuzenean ikusteko aukera egongo da, hamar egunetan, EITBrekin elkarlanean. Horrekin batera, albisteak, bideoak, argazkiak eta gehiago jasoko dira.

Korrikaren hasiera eta bukaera

Goienak bat egingo du bihar ETBrekin, Berriarekin, Hamaikarekin, Infosarekin, Kanalduderekin eta Xaloarekin, Korrikaren hasiera Garestik (Nafarroa) emateko. 16:10ean hasiko da emankizuna. Aurkezleak Ilaski Serrano eta Naroa Iturri izango dira; erreportariak, berriz, Amaia Txintxurreta (Goiena), Ion Orzaiz (Berria), Pantxika Maitia (Kanaldude) eta Julen Iraola (Infosare). 
 
Hala, bihar, hilaren 4a, 16:10ean, Goiena telebistan eta Goiena.eus atarian, Korrikaren hasiera zuzenean ikusteko aukera egongo da. Era berean, apirilaren 14an, domekan, 12:00etan, Goiena telebistan eta Goiena.eus atarian,  Korrika nola amaitzen den ere zuzenean emango da.
 

Korrika Debagoienean

Korrikak hurrengo aste bukaeran zeharkatuko du Debagoiena: apirilaren 13an, Oñati eta Bergara; eta 14an, Aramaio, Arrasate, Aretxabaleta, Eskoriatza eta Leintz Gatzaga. Debagoieneko ibilbidearen irudiekin saio berezia ekoiztuko du Goienak, eta Goiena telebistan emango du domekan bertan, 22:00etan, eta Goiena.eus atarian egongo da ikusgai astelehenean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.