Hitzarmen ekitaldian izan dira erakunde horietako ordezkari nagusiak; batetik, Santi Otxoa de Eribe, Goiener kooperatibako zuzendaria, eta bestetik, Begoña Pedrosa, Humanitate eta Hezkuntza Zientzien Fakultateko dekanoa.
Hitzarmen horri esker Mondragon Unibertsitateko Humanitate eta Hezkuntza Zientzien Fakultatea bazkide laguntzaile izango da Goiener elkartean. Gainera, aurrerantzean, Goiener izango da Aretxabaletako eta Eskoriatzako campusetako energia hornitzailea.
Hitzarmenaren helburua erakunde bien arteko harremanetan sakontzea eta kontsumo eta energiaren erabilera arduratsua sustatzea dela adierazi dute, baita fakultateak kontsumituko duen energia guztia, aurrerantzean, berriztagarria izango dela bermatzea ere.