Oñatiko futbol taldeak 2-0 irabazi dio Beasaini. Eta hiru puntu horiei esker txantxikuek (53 puntu) aurrealdeko postuetan jarraitzen dute Lagun Onaken (56) eta Urolaren (57) atzetik. Txarrena bi oilar horiek ere ez dutela barkatzen, oraingo asteburuan ere irabazi egin dute-eta. Partiduko 67. minutuan Unai Gilek egin du 1-0ekoa –jokaldi nahasi batean argi ibilita–. Eta 2-0ekoa gazte mailatik igo eta talde nagusiarekin debuta egin berri duen Xabier Aiastuik egin du. Hala, garaipen horrekin datorren astean liderraren kontrako norgehiagoka finalean bilakatu da.
Ohorezko erregionalean Mondra ondo
Goragoko kategorian Bergara izan da etxean jokatu duen bakarra. Hirugarren postuan dagoen Tolosaren bisita izan dute Juaristiren mutilek, eta mahoneroek talde gaztearekin eta bergararrez osatutakoarekin egin diote aurre. Hala, 60 minutuz indarrak parean egon eta gero tolosarrek korner batean egin dute 0-1ekoa, eta neurri handian hor amaitu da norgehiagoka, ondoren bigarren gol bat etorri bada ere (0-2).
Aretxabaletak, berriz, puntu bat ekarri du Hondarribiatik (1-1). Ez da puntu txarra, batzea delako, baina Hondarribia kategoria galduta daukan taldea izateko, akaso, sari txikiegia izan da. Mondrak, berriz, sailkapenean erditik gora sailkatzeko borroka horretan kontrario zuzen Hernaniren zelaian jokatu zuen zapatuan. Eta, Davilaren mutilek ondo irabazi zuten; Ander Arroyok, eta Sanchez anaiek egin zituzten hiru golak.
Datorren astean Mutrikuren bisita izango du Mondrak, eta Aretxabaletaren eta Bergararen arteko derbia izango da Ibarran.