Mondragon Unibertsitateko Goi Eskola Politeknikoak bost urteko iraupena izango duen lankidetza-hitzarmena sinatu du Open Cloud Factory taldearekin, horren Open Cloud Factory Industrial Cybersecurity filialaren bidez, segurtasun digitalaren eremuan elkarlanean aritzeko. Hitzarmen honi esker, bi erakundeek batera egingo dute lan ikerkuntzako eta ezagutza transferitzeko proiektuetan, etengabeko prestakuntzan eta talentua erakartzeko egitasmoetan. Horrekin batera, etorkizuneko profesionalen prestakuntza sustatuko dute.
Zibersegurtasunaren alorra
Alor honetan Open Cloud Factory enpresak pisu handia du eta open source irtenbideetan, birtualizazioan eta cloud computingen espezializatuta dago. Mondragon Unibertsitatea berriz, zibersegurtasunaren eremuan lehen mailako eragile da eta enpresaren esku jarriko ditu arlo horretako ezagutza teorikoak eta esperientzia.
Doktorego-tesiak eta gradu eta master amaierako proiektuak
Akordio honek doktorego-tesiak eta gradu eta master amaierako proiektuak, txandakatzea (ikasketak eta lana) eta profesionalentzako ikastaroak egiteko aukera eskaintzen du.
