Kimuak katalogo berrian parte hartzeko deialdia zabaldu dute

Kimuak katalogo berrian parte hartzeko deialdia zabaldu dute
Iban Del Campo zinegile arrasatearraren 'Espedizio Handia' film laburra dago aurtengo Kimuak katalogoan.

Eusko Jaurlaritzaren Kultura Sailak Etxepare Euskal Institutuaren bitartez eta Euskadiko Filmategia Fundazioaren laguntzarekin antolatutako programa da Kimuak, eta euskal film laburren sustapena eta banaketa dauka helburu. Urtero katalogo bat argitaratzen dute eta datorren urtekoa osatzeko lanak jaso gura dituzte. Maiatzaren 24a da lanak bidaltzeko azken eguna; 'Kimuak.com' atarian dago informazioa.

Aurtengo katalogoan, zazpi film labur daude, eta horien artean dago Arrasateko Iban Del Campo zinemagileak zuzendu duen Espedizio handia, zientzia fikziozkoa. "Sorta horrek Donostia Zinemaldian hasi zuen ibilbidea, eta, harrezkero, 109 aukeraketa eta hamahiru sari eskuratu ditu, guztira; besteak beste, Rotterdamen (Herbehereak), Zinebi jaialdian, Euskal Zinema Bileran eta Aguilar del Campon eskaini ditugu filmak", diote ekimenaren bultzatzaileek.