ELAri dagokionez, Euskal Herri mailan lehen indarra da eta inoizko gehiengorik handiena lortu du. Deba eskualdeari dagokionez, Amagoia Lasagabaster Deba eskualdeko ELAko arduradunaren esanetan, ordezkaritza sindikalaren %49,53 ELArena da –Debagoieneko datu zehatzik ez dute–. "Eskualde honetan sekula izan dugun ordezkaritzarik altuena dugu. ELArentzat langileen ordezkari izatea oso garrantzitsua da, eta, horregatik, pozik gaude izandako emaitzarekin. Hauteskundeetan legitimitatea irabazten dugu eta botoz boto demokraziari bultzada ematen diogu. Gure ordezkaritza inork ezin du zalantzan jarri, langileen bozkak erabakitzen du soilik", adierazi du.
LABek ere gora egin du, bai Euskal Herri mailan, baita Debagoienean ere. 2014tik 2018ra bitartean %2,72ko hazkundea izan du bailaran. "Industria arloan mantendu egin dugu ordezkaritza, eta zerbitzu pribatuetan eta federazio publikoan gora egin dugu. LAB maximo historikotan dago, ordezkaritzari zein afiliazioari dagokionez. Hazten ari garen sindikatua gara, eta joera honekin jarraitzeko prestutasun osoa daukagu", dio Xabi Llodiok, LAB sindikatuko kideak.