Kasu guztietan ebakuazio galeriak tunel nagusiarekiko paraleloan joango dira, 30 metroko distantziara. Adif-etik azaldu dutenez, trenbide sareetako tunelen segurtasunari dagokion Europako arautegi berrira egokitzeko egingo dituzte lanok.
Induspeko tunelak 2.205 metroko luzera du eta bertan egingo duten galeriak 1.220 metro neurtuko ditu. Udalaitz-1 deritzonak, berriz, 3.157 metroko luzera du eta galeriaren neurria 1.410 metrokoa izango da.
Atxondo-Abadiño tartea
Bestalde, Atxondo-Abadiño tarteko lanak exekuzio edo kontratazio fasean daudela ere iragarri dute. Zati horretako adar nagusian 5.660,77 metroko bide bikoitza eraikiko dute. Horrez gain, bide bakarreko beste bi adar ere gehituko dituzte, iparraldeko adarra eta hegoaldeko adarra; bakoitzak ia kilometro bateko luzera izango du. Adar nagusira lotuko diren bide bakarreko bi adar horiek Arrasate-Elorrio-Bergara lotunearen parte dira.
Zati horretan, 5.660 metroko bide bikoitza eraikiko dute, baina horrez gain, bide bakarreko beste bi adar eraikiko dituzte kilometro bateko luzera izango dutenak.